ÚGIT NÁSIYAT ILAJÍ ÓTKERILDI
Qaraqalpaqstan Respublikası Ishki Isler ministrligi úshinshi zonalıq aymaq zonalıq muwapıqlastiriw orayı kinologiya toparı xızmetkerleri tárepinen Taxtakópir rayonlıq Mektepke shekemgi hám mektep bilimlendiriw bólimine qaraslı ulıwma orta bilim beriw mekteplerinde oqıwshı jaslardı watansúyiwshilik ruwxında tárbiyalaw, kinologiya xızmetine qızıǵıwshılıǵın jáne de arttırıw maqsetinde ulıwma hám arnawlı jónelisleri boyınsha tayarlanǵan xızmetleri járdeminde kórgizbeli shıǵıwları kórsetildi. Jańa qararǵa bola, fizikalıq hám yuridikalıq táreplerge úyretilgen iytlerdi satıp alıw yamasa óz iytlerin arnawlı kónlikpelerge úyretiw imkaniyatı jaratıldı.
Ózbekistan Respublikası Ministrler Kabinetiniń 2019-jıl 9-sentyabrdegi 750-sanlı qararına ózgerisler hám qosımshalar kirgizilip, 2023-jıl 31-avgusttaǵı 432-sanlı qararına tiykarlanıp, endi fizikalıq hám yuridikalıq tárepler de úyretilgen iytlerdi satıp alıwı yamasa óz iytlerin arnawlı kónlikpelerge úyretiwi múmkin.
Usı qarardıń orınlanıwın támiyinlew maqsetinde 3-ZAZMO Kinologiya toparı xızmetkerleri Taxtakópir rayonındaǵı bir qatar ulıwma orta bilim beriw mekteplerinde kórgizbeli shıǵıwlar ótkerdi. Onda ishki isler uyımları kinologiya xızmetiniń professional kinologları tárepinen xızmet iytleri menen ótkerilgen kórgizbeler oqıwshılarda úlken qızıǵıwshılıq oyattı.
Kórgizbeli shıǵıwlar dawamında puqaralar hám shólkemlerge tiyisli iytlerdi ulıwma boysınıwshılıq hám qorǵaw-qarawıl kónlikpelerine tayarlaw boyınsha tólemli xızmetler haqqında tolıq maǵlıwmatlar berildi.
Sonday-aq, respublikamız aymagında otkerilip atırgan "QARA DÁRI-2025" operativ-profilaktikalıq ilajı sheńberinde oqıwshılarǵa náshebentliktiń zıyanlı aqıbetleri, onıń jınayıy juwapkershilikke alıp keliwi haqqında túsinikler berilip, jaslar náshebentlikten eskertildi.
Bunday ilajlar jámiyetimizde huqıqbuzarlıqlardıń aldın alıwda hám jaslardı durıs jolǵa baǵdarlawda úlken áhmiyetke iye.
J.ATAJANOV
QR IIM 3-ZAZMO KINOLOGIYA TOPARÍ KINOLOGI QATARÍNDAǴÍ KISHI INSPEKTOR
