САПЛАСТЫРЫЎ ТӘРТИП-ҚАҒЫЙДАЛАРЫ ӘПИЎАЙЫЛАСТЫРЫЛДЫ
Өзбекстан Республикасы Президентиниң 2019-жыл 7-июнь күнги «Исбилерменлик субъектлерин сапластырыў тәртип-қағыйдаларын әпиўайыластырыў ис-илажлары ҳаққында»ғы ПП-5739-санлы Пәрманы қабыл етилди.
Пәрманға муўапық 2020-жыл 1-январьдан баслап:
Финанс-хожалық жумысын әмелге асырмай атырған ҳәм нызамшылықта белгиленген мүддетлерде өзлериниң устав қорларын қәлиплестирмеген кәрханаларды сапластырыў бойынша турақлы ислеўши арнаўлы аймақлық комиссияларды сапластырыў;
Мәмлекетлик дизимнен өткерилген ўақыттан баслап биржыл даўамында устав қорын шөлкемлестириў ҳүжжетлеринде нәзерде тутылған муғдарда қәлиплестирмегенлиги ушын исбилерменлик субъектлерин сапластырыў тәртибин бийкарлаў;
Мәмлекетлик органлар арасында электрон хабар алмасыўын енгизиў арқалы исбилерменлик субъектлерин сапластырыў процессиндеги артықша ҳүжжетлер ҳәм тәртип-қағыйдаларды қысқартыў белгилеп берилди.
Соның менен бирге 2020-жыл 1-январьдан баслап төмендеги тәртип орнатылып, оған муўапық:
а)исбилерменлик субъектлери-юридикалық шахсларды (кейинги орынларда - кәрханалар) ыхтыярлы сапластырыўда;
бир яки бир неше турақлы басылымларда кәрхананың сапластырылыўы ҳаққында дағазалар бериў талап етилмейди, бунда тийисли мағлыўматлар дизимнен өткериўши уйымның рәсмий веб-сайтына жайластырылады;
мәмлекетлик дизимнен өткерилген ўақыттан баслап финанс-хожалық искерлигин әмелге асырмаған ҳәмде салық қарызы болмаған кәрханалардың финанс-хожалық жумыслары тексерилмейди;
мәмлекетлик салық органлары тәрепинен өткерилетуғын, сапластырылатуғын кәрхананың финанс-хожалық жумысларын тексериўдиң ең узақ аралығы үш жыл мүддетти қурайды;
финанс-хожалық жумысын тексериў ушын ўәкилликли мәмлекетлик уйымлардан кәрхана ҳаққындағы мағлыўматларды алыў Исбилерменлик субъектлерин мәмлекетлик дизимнен өткериў ҳәм есапқа алыўдың автоматластырылған системасы (кейинги орынларда - система) арқалы әмелге асырылады;
кәрхананы ықтыярлы сапластырыўдың улыўма мүддети дизимнен өткериўши ықтыярлы сапластырыў ҳаққында хабардар етилген күннен баслап алты айдан аспаўы керек.
б)исбилерменлик субъектлери – физикалық шахслар өз искерлигин тоқтатыўда арза бериўши тәрепинен мәмлекетлик салық хызмети уйымының салықлар ҳәм басқа мәжбүрий төлемлер бойынша қарызы жоқлығы ҳаққындағы жуўмақты алыў талап етилмейди.
в)финанс-хожалық жумысларын әмелге асырмай атырған кәрханаларды сапластырыўда:
кәрхананы финанс-хожалық жумысларын әмелге асырмай атырған деп есаплаў ушын тийкар болатуғын мүддет тоғыз айды қурайды;
финанс-хожалық жумысларын әмелге асырмай атырған кәрханалар мәмлекетлик салық хызмети уйымының усынысына тийкар дизимнен өткериўши уйым тәрепинен үш жыл мүддетке ҳәрекетсиз режимине өткериледи;
ҳәрекетсиз режимине өткерилген кәрханалар искерлиги үш жыл даўамында тикленбегенде дизимнен өткериўши уйым оларды исбилерменлик субъектлерин бирден-бир мәмлекетлик реестринен шығарады.
П.Реймкулов
Тахтакөпир районы Мәмлекетлик
хызметлер орайы директоры
